etwas verspätet...

A guads Neis

Woromn scho wieder?
Woromn grad jedz?
Woromn ned alles zamma:
Wenderafang au Weinachda Heilnachda on a guads Neis?

Oder wenigschdens erschd am21. März:
Zeit da die Könige pflegten ins Feld zu ziehen -
wo se anander dr Riasl vrschlaa und d Weiber glaud hen
weil se im Frihleng dr Haber gschdocha hod
weil se s Hemmad gjugg hod

Woromn scho wieder heidanei?
Da kommsch doch zo nex anderem meh
vor lauder herzliche fröhliche glückliche seeliche
Glücklücke Wunschlücke Punschlücke
Wann soll mr denn da no ei Sach schaffa?
On bloß weil domols die daube Konsuler
ned ferdich worda sen mid dem Uffschdand en Hischbania?
Da drewega soll i scho wieder Bädsch geba
Karda schreiba on aläuda?
Da wär e doch schee bleed -
Da drwega schdohds heid nachd am zwölfe ned schidz uff Gnobf
s machd doch sowieso jeder grad so wieder
Da kennase Kanonaschläg zenda soviel se welled -
Aus seim Drodd kommd drwega no koiner raus -
A oobeschriebas Bladd s neie Johr?
S wird werda wia s alde
mid a baar gloine Änderonga -
Frei de ned z arg
Han ned zviel Angschd:
Obs Eiszabfa hagled oder ned
Mr laufd sowieso hald grad weider
sobald mr wieder ka
noch dem Silveschderdulloh

Helmut Pfister - Brauchvers - Silberburgverlag